فكرة

السلام عليكم
فكرتنا يا جماعه تتلخص في مسابقة
المسابقة دي هتكون بين كل المدونين اللي عايزين يشتركوا وهما نفسهم اللي هيصوتوا في المسابقة دي
المسابقة هتتعمل بشكل مبسط قوي زي مسابقات كاس العالم كده
كل واحد هيقدم الموضوع اللي عايز يشترك بيه في تعليق ( يضع الرابط بتاع الموضوع بس )
كل اربع موضوعات نضعهم في مجموعه واحده ويكون التصويت مثلا في المجموعه الاولي لواحد او اتنين او تلاته وهكذا
طبعا كل مجموعه هيخرج منها موضوع والموضوعات اللي هتفوز هيتعمل بينها تصفيات
وفي النهاية يكون في موضوع كل شهر فائز بافضل موضوع
مسموح بالتعليق لكل صاحب مدونه او علي الاقل عنده بروفيل علشان نتاكد ان محدش يدخل باسم مش معروف ويصوت لنفسه 20 مره احنا اتبهدلنا من الموضوع ده في عالم الواقع

طيب وايه الاستفاده من الموضوع ده ؟
الفكرة دي وصلنا ليها بعد ما اتضح لينا اننا مش بنقدر نتابع كل المدونات والناس مش بتتابع بعضها
غير كده ان في ناس بتفقد الحماس للكتابه لكن لما تحس انها فعلا بتشارك وبتنجح وفي اكتر من هدف في الحالة دي هيكتب ومش هيبطل ابدا باذن الله
في النهاية كل اللي يحب يشاركنا يكتبلنا تعليق وينوه في مدونتة عن الموضوع ده
واللي عنده اي اقتراح احنا منتظرينه
والله الموفق

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

:تحديث

(اسئلة واستفسارات )

السؤال الاول : من حق اي حد يحط اكتر من موضوع ؟ يعني المشارك ممكن يشارك باكتر من موضوع

الاجابة : من حقك تشارك بموضوع واحد بس حتي وقت قريبا ان شاء الله لو عملنا تصنيفات هيكون من حق كل شخص انه يشارك بموضوعين

السؤال الثاني : ليه ميكونش فيه تصنيفات للمموضوعات لان معني اني اقارن بين موضوع سياسي وموضوع ادبي يبقي فيه ظلم للقارئ ( اعتقد ان ده استفسار بس ان صنفته غلط معلش )

الاجابة :بما ان الاقبال لسه مش متزايد مينفعش يا جماعه اعمل تصنيف وانا مش عندي موضوعات كفاية يعني مثلا الموضوعات السياسية لحد الان مفيش غير موضوع واحد في حالة اني اعمل تصنيفات يبقي هيفوز لان مفيش غيره مش علشان الافضل ( وطبعا انا شايف ان كل الموضوعات جميله حتي الان )

السؤال الثالث : هل فيه حيادية ؟

الاجابة : انا وصرصاره مش هندخل في المنافسة لضمان الحيادية ومع ذلك الهدف الاكبر ان الكل يقراء كلام الباقيين عايزين يكون فيه تواصل

والله الموفق

تحياتي

------------------------------

تحديث

ـــــــــــ

السؤال الرابع : هل سيكون التدوين نظيف يعني خالي من السباب والالفاظ وكده ؟

الاجابة : بالطبع هيكون خالي من اي الفاظ تخدش الحياء

واحد هيقولي بس دي حريتهم انهم يكتبوا براحتهم

هقوله اغلب اللي بيدافع عن موضوع الاسلوب السئ في الكتابه في المدونات بيقول ان المدونه دي بيته يعني هوه حر يعمل فيه اللي عايزه وانا اقتنعت مؤخرا بكده بس ميجيش بقي وينشر اللي موجود في بيته وينزله مسابقة في الشارع

المدونه دي مش ملكي لوحدي ولا بيتي المدونة دي ملك كل فرد هيدخل فيها ويقراء

السؤال الخامس : هل يوجد ضوابط للمسابقة ؟

الاجابة : اول ضابط ان كل واحد هوه اللي يرشح موضوعه

ثانيا الناس هي اللي هتحكم مش انا ولا صرصاره احنا بس بنقوم بدور التنظيم يعني نحسب النقط ونعلن النتائج

بالنسبه للهدف من الموضوع بما ان الناس اللي هتحكم فاحنا سايبينهم هما اللي يحكموا علي كل بوست وانا مش الحاكم بامر الله اللي هقول البوست ده حلو وينفع يدخل او لا بس الضابط الاساسي عدم السب وطبعا الكلام الاباحي ممنوع

هرجع واقول تاني اننا هنعمل تصنيف بس بعد ما نجمع اكبر كم من المتسابقين علشان التصنييف يكون مفيد

السؤال السادس: ازاي هيتم التصويت ؟

الاجابة : بعد ما نحط اربع بوستات في كل مجموعه كل واحد هيدخل يقراء الاربع بوستالت عن طريق روابطهم وهيحكم افضل بوست عجبه فيهم ويبعت اجابته في كومنت وطبعا في الوقت المحدد للتصويت بعد كده هنحسب النقاط ونعلن افضل بوست كان ايه

والله الموفق